يا اللى انتِ شعبك صار باكى

شعر: شامخ الشندويلى

بعد اما كنا على القمة
وف كل حتة بنتقدَّر
بقى ابن ناقص بيهننا
ياشعب حاله بيتدحدر

حتى المصنن والهايف
بيهين فى مصر ومش خايف
يا وطنى إصحى آديك شايف
بقى العويل بيك يتمسخر

ايه اللى صابك ياعظيمة
ياللى انت قدوة وزعيمة
فوقى وبلاش قلة قيمة
ولا انت عاجبك دا المنظر

ياللى العرب صفر بدونِك
ورغم ذلك بتخونِك
لو صنتى شعبك حيصونِك
ويعلى راسك ويكَبَّر

ردى القلم ردى كرامة
ودوَّقى الندل ندامة
اللى بصهاينة بيتحامى
ويقل أدبه على الأكبر

بيقل أدبه على سيدُه
عشان نتانياهو ف إيدُه
شغل الصهاينة لا حيفيدُه
ولا يلزقه لو يتكسَّر

شوفى المرض ايه ودواكى
يا اللى انتِ شعبك صار باكى
وحاله بره وجواكى
بقى لغز عايز يتفسَّر

من ديوان / اللى جاى بكرة